Ers blynyddoedd bellach mae Gwerin Gwallgo, ysgol gerdd Trac Cymru i gerddorion ifanc yn eu harddegau, wedi hybu datblygiad personol cannoedd o bobl ifanc trwy gynnig gofod addysgol a chymdeithasol cyffrous i ddarganfod eu diwylliant a’u creadigrwydd gyda’i gilydd.
Mae’r cyrsiau preswyl hyn wedi chwarae rôl hanfodol trwy wella hyder pobl ifanc, yn ogystal â chaniatáu gofod ac amser gwerthfawr i wneud ffrindiau newydd a sefydlu rhwydweithiau o gyfoedion o bob cwr o Gymru sy’n rhannu’r un diddordebau. Dywedodd un rhiant brwd wrthym mai “dyma’r un lle ble mae hi’n teimlo ei bod hi wir yn perthyn … mewn ffordd sy’n ei chyffroi a’i hysbrydoli”.
Mae Gwerin Gwallgo yn meithrin cysylltiad dwfn rhwng pobl ifanc a diwylliant a threftadaeth eu cenedl, a hynny mewn amgylchfyd ysbrydoledig sy’n llawn o gerddoriaeth, canu a dawnsio traddodiadol, a than arweiniad rhai o diwtoriaid mwyaf disglair y sin werin yng Nghymru. Mae cymdeithasu â cherddorion a dawnswyr ifanc eraill, dysgu technegau newydd, gwella hyder, ac archwilio hunanfynegiant oll yn rhan o’r manteision arbennig sydd i’w cael o fynychu’r cyrsiau hyn.
Gallwch wylio ein fideo hyrwyddo o’r cwrs Gwerin Gwallgo 2020 yma 👇
Mae’r clocsiwr adnabyddus a’r tiwtor ar gyrsiau Gwerin Gwallgo, Huw Williams, yn pwysleisio’r effeithiau cadarnhaol y bu’n dyst iddynt fel rhan o’r rhaglen: “Mae’n amhosib mewn gwirionedd i eiriau ysgrifenedig ddisgrifio’r hyn y gall dysgu cerddoriaeth a dawns ei wneud i hyder person ifanc… y perthnasau sy’n datblygu ar y cyrsiau hyn, yn ogystal â’r sesiynau anhygoel gyda’r nosau, sy’n mynd i achosi i’r sîn werin yng Nghymru ffynnu.”
Mae llawer o’r mynychwyr yn dychwelyd dro ar ôl tro, ac mae nifer ohonynt yn ymuno â’r tîm fel gwirfoddolwyr a chymorthyddion wedi iddynt dyfu i fyny, gan ddod yn fodelau rôl sy’n ysbrydoli newydd-ddyfodiaid. Mae’r cyrsiau a ddarperir gan Trac Cymru wedi gosod y seiliau i feithrin y genhedlaeth nesaf o sêr y sîn werin yng Nghymru, gan gynnwys y perfformwyr ifanc talentog hynny sydd wedi mynd ymlaen o gyrsiau Gwerin Gwallgo i ymuno ag Ensemble Gwerin Ieuenctid Cymru.
Mae pawb sy’n mynychu’r cyrsiau yn cael cyfle i serennu, gan gynnwys y cerddorion ifancaf oll – gyda chyfleoedd i fod yn rhan o Fand Mawr Gwerin Gwallgo, i gefnogi bandiau proffesiynol mewn cyngherddau arbennig, a hyd yn oed i synnu cynulleidfaoedd gyda pherfformiadau annisgwyl mewn gofodau cyhoeddus, fel y digwyddiad cofiadwy hwn yng nghanolfan gelfyddydau Galeri, Caernarfon.
Wrth reswm, ni fu modd cynnal ein cyrsiau yn ystod y pandemig Covid-19, ond bwriad Trac Cymru yw ail-lansio’r gweithgareddau hanfodol hyn i bobl ifanc yn fuan iawn. Gallwch ein cynorthwyo yn y gwaith o ariannu ein rhaglenni addysgol trwy gyfrannu heddiw. Cefnogwch ni trwy rannu’r straeon hyn â’ch ffrindiau neu gydweithwyr, ac ymunwch â ni trwy rannu eich atgofion hapus eich hunain am gerddoriaeth werin Cymru ar y cyfryngau cymdeithasol gyda’r hashnod #TRAC21
