Comisiynodd Cyngor Celfyddydau Cymru adolygiad o’r sector Cerddoriaeth Draddodiadol yng Nghymru. Mae ansawdd ein hartistiaid yn eithriadol o gryf ac mae cerddoriaeth draddodiadol wedi’i gwreiddio mewn cymunedau ledled Cymru, gyda chysylltiad dwfn â’r Gymraeg, diwylliant a’r wlad. Yn gynyddol mae ein cerddoriaeth draddodiadol a’n hartistiaid yn denu sylw rhyngwladol, ac mae ymgysylltu â cherddoriaeth yn helpu i gefnogi lles a datblygiad cymunedol. Mae’r adolygiad hwn yn rhoi cyfle amserol i edrych ar y ffordd orau i CCC gefnogi’r sector a sut y gall y sefydliadau sy’n weithredol yn y sector – ar draws pob lefel – weithio’n fwy cydlynol ar ran ein cerddorion, cymunedau a chynulleidfaoedd.

Penodwyd Angharad Wynne yn Gomisiynydd yr adolygiad a Thŷ Cerdd oedd â’r dasg o reoli’r broses. Mae gan y tîm hwn hanes rhagorol o weithio'n ymgynghorol ar draws sectorau cerddoriaeth Cymru. Antwn Owen-Hicks, sydd â chyfoeth o brofiad personol a phroffesiynol o fewn y sector, oedd y rheolwr prosiect arweiniol ar ran Tŷ Cerdd, a chynigiodd tîm Trac Cymru eu harbenigedd, eu profiad a’u rhwydweithiau. Gyda’n gilydd, edrychwn ymlaen at weithio gyda chi ac eraill ar draws y sector i gyflwyno proses drylwyr a chydweithredol a fydd yn caniatáu ichi gynnig eich barn a rhannu pryderon a syniadau ar gyfer dyfodol y sector pwysig hwn.